رمضان 2020 | مسلسلات رمضان 2020 |

-: الفصل الثالث :-

" قريبا سيضع الله يده على كتفي ولن افارق حضنه مرة اخرى "

هنكمل معاكم احداث الفصل الثالث ، بس هنفكركم سريعا ب الفصل الثاني واللي انتهت احداثه بأن ايسيل حلمت ب يسوع وكانت قايمه فرحانه وبعدين قامت علي جرس الباب ولقت يوسف … 

انا لسه صاحيه من النوم مسكت الفون لقيت مسدچ مبعوته الساعه 9 الصبح من رقم غريب وتقريبا كدا لما ركزت في الرقم عرفت مين هو ، انا عارفه الرقم دا بتاع مين وللاسف مش هسجل الرقم كمان ، ضحكت ضحكه صفره كدا وبقول افتكرني اخيرا ، لسه يدوب هفتح المسدچ عشان اشوف فيها ايه! لقيت الباب بيخبط قومت وانا شعري منكوش وبفتح الباب ولقيت يوسف في وشي ، فضل باصصلي كدا ويضحك انا جريت دخلت جوا وسبت الباب مفتوح دخلت عدلت هدومي وغسلت وشي وعدلت شعري وخرجت ، سلمت عليه وقعدت ..

يوسف : فين البنت اللي فتحتلي الباب .

انا : احنا هنهزر بقا وبعدين انت صاحي وجاي بدري كدا ليه .

يوسف : اقوم امشي يعني! .

انا : لا مش قصدي بس ..

يوسف : هو ايه اللي بس وبعدين انا جاي اطمن علي ماما مش عليكي .

انا : بقا كدا يعني !! .

يوسف : اه كدا .

انا : ماشي ماشي ، هقوم اصحيها .

يوسف : تمام يلا عشان انا جايب فطار نفطر احنا التلاته ، قصدي انا وماما بس .

انا : والله بقا هي كدا يا سيدي ماشي .

دخلت اصحي ماما وقولتلها ان يوسف جيه بره يتطمن عليها خرجت سلمت عليه سبتهم ودخلت احضر الفطار وفطرنا مع بعض وبعدين عملت الشاي ، وخدنا الدوا وفضلنا قاعدين بدأ يتكلم مع ماما ..

" بالمناسبة ماما اسمها إيڤون " 

لقيته بكل تلقائيا بيقولها عامله ايه انهارده يا ايڤو ، بيدلع ماما ويقولها يا ايڤو؟!، بصتله كده بأستغرب ولقيتهم الاتنين مندمجين في الكلام اوي مع بعض وماما مبسوطة بيه جدا خلصوا كلامهم مع بعض ولقيت ماما بتبصلي وبتقولى..

ماما : الحمدالله ان ربنا رزقك ب اخ ابن ناس وجدع ومحترم كدا زي يوسف ..

انا: اه الحمدالله .

لقيته بصلي بصه فيها حنيه اوي ، فضلنا باصين لبعض وسرحت خالص في عيونه اللي تودي بلاد وتجيبك وراها هو ازاي بالحلاوة والجمال دا ؟ شوية وبعدين ماما فصلتنا ..

ماما: ايه دا مالكوا في ايه !

انا : اتوترت وقولتلها اه ايه في ايه طب انا هقوم اعملكوا شاي فضلوا يضحكوا عليا وبعدين يوسف قطعني في الكلام ..

يوسف : تعالي يا ايسيل متعمليش حاجه .

انا: ايه دا ليه ؟

يوسف: هقوم امشي انا بقي عشان عندي مشوار كدا ولو تسمحي يا ماما اجي اخدها بكره عشان نروح الجامعه سوا .

ماما بكل تلقائيا : ماشي ي حبيبي حطها في عينكك دي امانة دي .

يوسف: اكيد طبعا يا ماما دي فوق راسي مش في عيني بس .

بصلي بضحكة حلوة اوي وخطفني بيها وقام وقف عشان يمشي روحت معاه فتحتلوا الباب ..

يوسف: عن اذنك يا اميرتي .

انا قفلت الباب وفضلت واقفه متنحه كدا وفاتحه بوقي ومش فاهمه حاجه هو ايه اللي اميرتي!! يعني ايه انا اميرته دي؟ ، دخلت لقيت ماما بصالي كدا بصة الامهات اللي انتوا عارفينها دي وقالتلي تعالي هنا ، روحت قعدت جمبها وفضلت تتكلم معايا علي يوسف..

ماما: باين عليه بيحبك جدا وشكله راجل وجدع ومحترم انتي مشفتيش كان عامل معانا ازاي واحنا في المستشفي وجبنا لحد هنا وجيه انهارده يتطمن علينا ، وخايف عليكي ازاي .

انا: ماما انتي عارفه اني مش بفكر في الموضوع دا دلوقتي ولسه قصادي دارسة وشغل ومستقبل غير الجواز والكلام الفاضي دا .

ماما : يا بنتي انا عايزه افرح بيكي قبل ما اموت واكون سايبكي واطمن عليكي مع اللي هيخاف عليكي ويشيلك في عينه .

انا : بعد الشر عليكي يا ماما متقوليش كدا ، سبيها علي ربنا .

ماما: ماشي يا بنتي فكري برضو .

انا: حاضر ي ماما ...

" بعد مرور ساعة "

قومت دخلت الاوضه ومسكت الفون فتحت لقيت مريم بعتالي مسدچ سلمت عليها وبعدين فضلنا نتكلم وحكتلها اللي حصلي انا وماما وخدت العنوان مني وجت قعدت معانا شوية وبعدين قالتلي ..

مريم : تعالي ننزل نتمشي شوية بدل ما انتي قعده كدا .

ماما : ايوة يبنتي خديها تشم شوية هواء كدا .

مريم: حاضر يا طنط متقلقيش هي معايا ومش هنتأخر .

قومت لبست ونزلنا اتمشينا شوية وفضلت اتكلم معاها علي يوسف واحكيلها اللي حصل معانا و وقفته جمبنا و ان انا شكلي حبيته ولا ايه! ، وشها اتقلب ١٨٠ درجة لم قولتلها اني بحب يوسف ويادوب لسه هتتكلم وهتزعق جالها تليفون وفاة جدتها ، جريت انا وهي روحنا علي طول علي البيت بتاعهم كلمت ماما قولتلها اللي حصل وعرفتها اني هتأخر عشان موجوده مع مريم مش هسيبها ماما كانت عايزه تيجي ، قولتلها لا خليكي بكره نبقا نروحلهم متنزليش دلوقتي عشان انتي تعبانه فضلنا قاعدين وكلمت باقي العيال جم ويوسف وكلوا ، و احنا قاعدين كنت سامعه الناس بتتكلم ان هي كانت تعبانه وعندها المرض وكانت في صراع معاه ، الحمدالله ان ربنا رحمها طبعا ، مع المسيح ذاك افضل جدا ، بعد شوية غسلوها وخدناها لاقرب كنيسة عندهم ودخلنا نصلي عليها وبعدين روحنا الدفنه والمكان كان بعيد شوية وكان اسم المنطقه غريب و انا مش فاكره بصراحه فضلت واقفه مع مريم لحد ما خلصنا وخلاص مروحين لقيت يوسف بيشورلي من بعيد تعالي ..

يوسف : اركبي معايا العربية بدل ما تركبي هناك معاهم ..

المهم ركبت معاه و كان معانا روي ورنا وبيلي ، خلص اليوم ورحنا مع مريم لحد البيت وبعدين الوقت اتأخر قولتلها همشي واجيلك تاني بكره كانوا كلهم نزلوا ماعدا يوسف كان قاعد معانا ، قومت سلمت عليهم وبعدين نزلت لقيت يوسف نزل قبلي وواقف تحت .

يوسف : يلا عشان اروحك الوقت اتاخر ومينفعش تمشي لوحدك ..

انا : ومينفعش اركب معاك العربية في وقت زي دا اتفضل انت امشي وانا هطلب اوبر .

يوسف : يا سلام يعني مينفعش تركبي معايا انا وتركبي مع بتاع الاوبر دا دلوقتي صح؟ .

انا: اه عادي يعني .

يوسف: اركبي بس بدل والله ما اشيلك واحطك في العربية بنفسي قال اوبر قال .

انا: ايه دا ايه دا ايه الاسلوب دا ؟! .

يوسف: يستي اركبي انتي لسه هتقولي اسلوب ومش اسلوب 

انا : ضحكت ، وركبت معاه تقريبا فضلت ساكته نص الطريق .

يوسف: هتفضلي ساكته كدا كتير ؟

انا: خير عايزني اتكلم اقول ايه يعني .

يوسف: عادي يستي اي حاجه .

انا : مريم صعبانه عليا اوي هي ومامتها .

يوسف : اه فعلا ربنا يرحمها راحت عند الاحسن من الكل .

يوسف : ايه بقا اتكلمي سكتي تاني ليه؟

انا: لا انا معتبرك دلوقتي كابتن اوبر مينفعش اتكلم معاك و انا معرفكش .

يوسف : يا بنتي بطلى لماضه بقي .

انا : هو انا اتكلمت ولا عملت حاجه 

يوسف : لا يختي انا اللي اتكلمت وقف بالعربية عند سوبر ماركت كبير كدا .

انا : رايح فين؟ .

يوسف : استني خليكي هنا متتحركيش هجيب حاجه واجي ، نزل السوبر ماركت وبعدين رجع حدف عليا شنطه من الشباك وركب ..

انا: ايه دا في ايه حد يخض حد كدا ؟ .

يوسف: اه انا .

انا : وبعدين ايه الشطنه دي افرض فيها حاجه تعورني يعني! .

يوسف : لمضه لمضه يعني مفيش كلام ، افتحي الشنطه وانتي ساكته .

انا : مسمحلكش علي فكره تكلمني كدا مش هفتح حاجه انا ، رميت الشطنه عليه وهو بيسوق ، وبصيت الناحيه التانيه 

يوسف : بيضحك وقالي خلاص متزعليش افتحي الشنطة وبطلي لماضه .

انا: بصتله كده بصه شريريه في نفسي فتحت الشنطة لقيتها مليانه شيكولاتة وجيلي كولا كتير وحاجات حلوة انا بحبها ... اتصدمت شوية وبعدين قولتله ايه دا حاجات مين دي .

يوسف : جايبها لبنت اختي .

انا : مين بنت اختك دي .

يوسف: بنتي .

انا: ايوة مين يعني انجز .

يوسف: انجز؟؟ وبتزعلي لم بكلمك وحش .

انا : ما انت اللي قاعد تقولي اختي وبنتي قول علي طول يعني هتزهقني ليه .

يوسف : جايبهم ليكي يا ستي خلاص .. 

انا : بصتله كدا وبعدين رميت الشنطه عليه تاني شكرا مش بقبل حاجه من حد معرفوش .

يوسف : وقف بالعربية علي جمب انزلى من العربية انا بوصلك ليه اصلا روحي بقي اطلبي اوبر بتاعك دا يجي يوصلك

انا: ماشي حاضر انا هنزل اطلب اوبر هات بقا الشنطه دي خدت شنطة الحاجه الحلوة وبفتح الباب لسه لقيته ضحك ضحكة جابتني الارض حرفيا .

يوسف: اقعدي اقعدي يا مطلعه عيني جايب بنت اختي معايا بجد .

قفلت الباب وبصتله بضحكه كدا لحد ما وصلت البيت ونزلت .

انا: شكراا علي التوصيله .

يوسف: هنزل من العربية والله ولو نزلت هتزعلي مني ، شكرا تاني برضو مش قولت بلاش الكلمة دي ؟ .

انا : الله طب قولى عايز كام بقي ما انت كابتن اوبر بقا ..

يوسف : مصممه انزلها من العربية حاضر ، بيفتح الباب ونازل روحت جريت دخلت البيت بصلي وضحك كدا ، وقالي اطلعي يا هانم اطلعي نامي بدري عشان هعدي عليكي بدري اخدك نروح الجامعه .

اتريقت علي طريقة كلامه وطلعتله لساني وجريت طلعت علي فوق .. 

" بعد مرور الوقت واليوم الصعب دا اخيرا وصلت البيت"

طلعت دخلت الاوضه عند ماما ابص عليها لقيتها نايمه مردتش اصحيها عشان هي تعبانه ودخلت اوضتي غيرت هدومي وحطيت الشنطه في التلاجه وانا عايزه احطهم في قلبي حرفيا من الفرحه اللي انا فيها ، ودخلت اقعد علي سريري " فـ هذا وقتي المفضل " حرفيا اليوم كان متعب جدا علي قد ما زعلت لمريم ومامتها علي قد ما فرحت اني شوفت يوسف تاني ، ربنا ينيح روحها ويصبرهم علي قد غلاوتها ، قومت وقفت قصاد صورة حبيبي ، انا مش بعدي يوم غير لما اتكلم معاه .. بص انا مش عارفه انا ماشيه صح ولا لا انت عارف اني هبله وكمان اول مره ادخل في علاقه زي كدا ومش عارفه اعمل ايه ممكن تقولي الطريق الصح ومتوجعش قلبي ، انا بدور في الدنيا علي حد يكون شبهك في حنيتك وامانتك وبساطتك واحتوائك واهتمامك بتفاصيلك الصغيرة بس ملقتش ومش هلاقي انت اجمل من بني البشر يا يسوع ، تصبح علي خير ..

لسه هبدا انام لقيت مسدچ جاتلي علي الفون!! وبرضو من نفس الرقم اللي انا مش هرد عليه طول حياتي وطول ما انا عايشه لحد ما ربنا يفتكرني ، عملت ميوت ل المسدچ ، وبعدين قعدت علي السرير لقيت يوسف باعتلي رسالة انا قريت المسدچ و تنحت ف الاخر!! معقول اللي هو بيقوله دا؟؟ .

**********************************

الي هنا قد انتهينا من الفصل الثالث من عجائب الحب ، لقراءة الفصل الاول اضغط هنا  ولقراءة الفصل الثاني اضغط هنا، اتمني ان تنال إعجابكم ، القصة بقلم " ست ورد " شكراً لمشاركتك ، إذا كان هناك اي استفسار او سؤال يمكنكم قولها في التعليقات او التواصل معي عبر صفحة اتصل بنا ، ولمتابعتنا علي حساب الفيسبوك اضغط هنا ولتويتر اضغط هنا ، دمتم سالمين .

لقراءة قصة الانكسارات الاخيرة الفصل الاول ، الثاني ، الثالث ، الرابع ، الخامس

وللقراءة عن مقال وصفات وادوية تخسيس الجزء الاول ، الجزء الثاني
ولمعرفة مسلسلات رمضان 2020 اضغط هنا .