الفصل الرابع
" جــمــيــع الــذيــن لــمــســوه نــالــوا شــفــاء "
هنكمل معاكم احداث الفصل الرابع بس هنفكركم سريعا بـ الفصل الثالث واللي انتهت احداثه بأن ايسيل جاتلها مسدچ من رقم غريب وبعدها علي طول مسدچ من يوسف يلا نبدا الفصل الرابع ونشوف قالها ايه!! .
حلمت ب اني في مكان غريب والمكان فاضي مفهوش حد خالص ، وإذ فجأة يطلع عليا واحد لابس عبايه سوده ومش باين منه ملامح خالص وبيقرب عليا وانا شوفت كدا طلعت اجري وهو بينده عليا يا ايسيل يا ايسيل وفي الاخر صحيت علي صوت التليفون بيرن من منه غريبه دي! .
انا : الوو صباح الخير .منه : صباح النور يا قلبي عامله ايه يا حبيبتي ؟ .
انا : الحمدالله بخير وانتي عامله ايه ؟ .
منه : الحمدالله ، انتي لسه نايمه يبنتي يلا قومي انا في الجامعه من بدري مستنياكي وعندي ليكي خبر يجنن بس يلا قومي بسرعه وتعالي .
انا : خبر؟! خبر ايه يا منه ؟!! .
منه : تعالي بس انتي وهتعرفي يلا باي .
انا : باي ، قومت قعدت علي السرير وقولت لنفسي ياتري عايزه ايه دي! و خبر ايه علي الصبح كدا ؟ .
مسكت الفون قولت لما اشوف ايه المسدچ اللي يوسف كان باعتها امبارح وانا نمت وملحقتش ارد عليه .
" الرسالة "
" انا مبسوط جدا اني شوفتك انهارده بغض النظر عن الظرف الوحش اللي كنا فيه بس اتبسط لما شوفتك وشوفت ضحكتك الحلوة دي تاني ، انا عايز اقولك اني اول مره حد يستحوذ علي حياتي بالشكل دا و في فترة قليلة كدا بجد انتي حاجه كبيرة اوي عندي يا ايسيل ربنا يخليكي ليا يارب ويخليني ليكي و اعوضك عن اي حاجه وحشه شوفتيها في حياتك ومخلكيش محتاجه حاجه ابدا تصبحي علي خير يا ست البنات "
شوفت المسدچ وقلبي قام من مكانه من الفرحة ، بصيت لصورة صاحبي وقولتله بجد شكرا ليك اوي مكنتش اعرف ان ردك هيكون سريع اوي كدا مهما اقول مش هقدر اوصف انا بحبك قد ايه ، بجد انا من غيرك ولا حاجه يا احلي اب في الدنيا ، لقيت باب الاوضه بيخبط وماما دخلت .
ماما : صباح الخير يا ايسو .انا : صباح النور يا احلي ايڤو في الدنيا .
ماما : مممم مالك فرحانه كدا ليه؟ خير .
انا : ها ، لا سلامتك يا ماما دا انا صاحيه فايقه شوية بس .
ماما : اه فايقه ، ماشي ماشي طب يلا عشان يوسف قاعد بره مستنيكي عشان تروحوا الجامعه .
انا : و ده جيه امتي ده؟ .
ماما : من شوية .
انا : طيب خلاص يا امي هقوم اهو اطلعي اقعدي معاه عقبال ما البس .
ماما : ماشي يلا يا حبيبتي .
قومت دخلت الحمام وبعدين دخلت الاوضه تاني لبست تيشيرت اسود وبنطلون اسود ودوست علي شعري بالمكواه وبعدين مفهمتش معني الحلم ايه وقولت عادي يعني حلم زي اي حلم وبعدين روحت خرجت .
انا : صباح الخير .يوسف : صباح النور يست الكل ايه التأخير دا ؟ .
انا : معلش بقي علي ما صحيت ولبست .
قامت ماما دخلت المطبخ وبعدين لقيت يوسف بيقولي ؟
يوسف : يلا عشان احنا متأخرين يا هانم ، المحاضرة الاولي قربت تبدا .
انا : تمام يلا هلبس الكوتشي بس .
ماما خرجت من المطبخ ايه دا انتو رايحين فين انا بحضر الفطار!!
يوسف : تسلم ايدك يا ماما بس احنا متأخرين اوي .
ماما : طيب يلا ربنا معاكوا يارب خلوا بالكوا من نفسكوا .
يوسف : متقلقيش يا حبيبتي ف عيني .
" نزلنا وركبت العربية "
انا : انا جعانه انا مش هدخل المحاضرة غير لما افطر .يوسف : تحبي تفطري ايه يستي .
انا : عايزه اكل بطاطس سوري من المطعم اللي في الجامعه .
يوسف : بس كدا من عنيا .
انا : و اشرب شويبس جولد .
يوسف : كمان من عنيا يستي .
بصتله كدا و انا مندمجه اصلا .
انا : هو ايه اللي من عنيا ، انت مالك اصلا مش هتاكل معايا وبعدين انا اللي هطلب .
يوسف: اهو بدأنا لماضه علي الصبح بدأنا .
اتريقت ع طريقة كلامه ، فضل يضحك ويقولى دا انتي مشكلة .
فضلت قعده عامله نفسي مش واخده بالي ومجبتش سيرة المسدچ خالص ولا هو فتح معايا كلام في الموضوع اصلا ، طلعت تلفوني من الشنطة ورنيت علي مريم عشان اشوفها هتيجي انهارده ولا لا لقيت تليفونها مقفول قولت ممكن تكون شبكه ولا حاجه .
انا : هو مفيش وصله في العربية هنا عايزه اشغل اغاني .
يوسف : كمان عايزه تشغلي اغاني .انا: دا لو مفيش مانع عند حضرتك يعني .
يوسف: يا باشا احنا عنينا ليكي .
انا : ميرسي مش عايزه عينك انا ، انا عايزه الوصله .
يوسف : طب عشان لمضتك دي مفيش وصله يلا بقاا .
انا : كابتن اوبر مش محترم وهعمل فيك شكوه علي فكره .
يوسف: اعلي ما في خيلك اركبيه يا قمر .
انا : لا انا مش هقدر استحمل الاسلوب دا ، نزلني هنا لو سمحت انا هاخد تاكسي .
يوسف: مفيش نزول خلاص قضي الامر يا شعلان .
انا: انت خطفني يعني ولا ايه مش فاهمه ؟ .
يوسف: اه خطفتك خلاص في مانع .
انا: اه حضرتك في موانع مش مانع واحد .
يوسف : يبنتي اسكوووتي بقي انتي ايه لسانك اطول منك ليه كدا .
" بعد عناد طويل مع بعض "
وصلنا الكلية نزلت وهو راح يركن العربيه ودخلت علي طول من غير ما استني حتي روحت علي الكافتيريا عشان كنت خلاص هموت من قلة الجوع ، لقيت البنات هناك ومعاهم روي وبيلي سلمت عليهم سألتهم فطرتوا ولا لسه يا شباب .
بيلي : اه يا اختي احنا هنا من بدري .منه : امال يوسف فين يعني مش جاي معاكي ليه ؟ .
انا: بصتلها كدا قولتلها وهو يجي معايا ليه !؟ اخويا ولا ابني مثلا عشان اشدو في ايدي وانا جايه ، ولا يكونش بايت عندي ف البيت وانا معرفش ؟ .
منه : ايه يبنتي في ايه انا بسألك بس اصل واخده بالي ان انتي وهو مندمجين مع بعض .
انا: ايوة ايه اللي مضايقكك في الموضوع برضو مش فاهمه ؟! .
بيلي : انهم يخترعون دين جديد .
انا: مالك ؟ .
جيه يوسف وسلم عليهم وبعدين بصلي لقيني وشي متغير
قومت وخدته علي جمب .
انا: انا مش هقعد معاهم تاني .
يوسف: ليه بس حصل ايه ف حد ضايقك ؟
انا: ابقي اسال صحابك عملوا ايه ، انا طالعه المحاضرة .
يوسف: خدي طيب مش هتفطري .
انا: مش هطفح انا .
يوسف: يبنتي خدي.
طلعت وسبتهم وقولت مش هقعد معاهم تاني انا مش فاهمه مالهم بياا يعني .
يوسف : ايه يا جدعان في ايه ، ايه اللي حصل ! .روي : يبني مفيش كانوا بيهزرو معاها وهي قلبت .
يوسف: محدش يضايقها يا جدعان .
منه : يا ابو قلب حنين انت وقعت في حبها ولا ايه ؟
يوسف : انتي عبيطه ولا ايه وبعدين انتي مالك اصلا ما تخليكي ف حالك يا بيلي .
" الشلة قعدت تضحك "
وبعدين منه راحت بصاله بقرف وقايمه وسايباهمطلعت المحاضرة وفضلت قاعده وخلصت وببص لقيت يوسف جايب فطار وطلع يقعد جمبي .
يوسف: حقك عليا متزعليش خلاص محدش هيضايقك تاني واللي يعملك حاجه تاني قوليلي وانا هكسرلك عضمه ، انا جبتلك حقك منها .
بصتله ب ابتسامه كدا وقولتلو ماشي .
يوسف : يلا نفطر بقا ولا ايه ؟
انا : يلا .
يوسف: اوبس .
انا: ايه يبني في ايه .
يوسف: نسيت اجيب الشويبس ، هنزل اجيبها واطلع .
انا: لا لا خلاص لما نيجي ننزل نبقا نشرب تحت .
يوسف: لا استني بس .
قام وراح جابلي الشويبس وطلع قعدنا نفطر مع بعض وبعدين خلصنا المحاضرات وقومنا نمشي كانت الساعه 7 ، كلمت ماما قولتلها اني هروح ل مريم ومعايا يوسف .
ماما : طب استني يبنتي البس واجي معاكوا .انا : خليكي يا ماما انتي عشان تعبانه وانا هروح كدا كدا البيت جمب الجامعه بحاجات بسيطه .
ماما : ماشي يبنتي عزيهالي .
انا : حاضر يا ماما .
ماما : وخلي بالك من نفسك ومتتأخريش .
انا : حاضر يا ماما .
روحت انا ويوسف عند مريم دخلنا فضلنا قعدين شوية معاها .
مريم : مالك ومال وشك شكلك مضايق .
انا : متشغليش بالك يحبيبتي دا ارهاق بس من مشوار الجامعه وكده .
مريم : بجد ولا في حاجه ومخبياها عليا؟ .
انا : يحبيبتي انتي فيكي اللي مكفيكي لما تفوقي من اللي انتي فيه ابقي احكيلك ونتكلم .
مريم : ماشي يستي .
فضلنا قاعدين شوية معاها لحد مالعزا خلص وقومنا عشان نروح كانت تقريبا الساعه 9 بليل ، نزلنا من عندها وركبت العربية واتحركنا المهم لقيته ماشي عكس بيتي ؟
انا : ايه دا انت رايح علي فين ! انا بيتي مش من الطريق دا .يوسف : ايوة انا عارف بس خطفك شوية .
انا : انت هتهزر ولا ايه .
يوسف : يستي متخافيش في ايه هنروح ناكل من عند ماك .
انا : قومت زي الهبله انط علي كرسي العربية وربعت رجلي ، بتكلم جد .
يوسف : اه بتكلم جد .
انا : الله كان بقالي كتير عايزه اروح عنده .
يوسف : اي خدمه يستي .
من كمية الفرحة اللي فيا مش عارفه اقوله ايه ولا اعمل ايه ومش عارفه هو بيعمل معايا ليه كدا ؟ وصلنا عند ماك ودخلنا وطلبنا الاكل ، المهم فتح تليفونه وقالي نتصور بقي .
انا : نعم ؟ يوسف : ايه ناخد صورة ذكري لليوم .
انا : لا مش بحب اتصور انا .
يوسف : هو ايه اللي مش بحب اتصور انا هنتصور عفكره .
فتح التليفون والكامير وراح مصورنا كام صورة ، بصراحه انا كنت هموت واتصور معاه بس قولت استهبل شوية ، خلصنا اكل وتصوير وماما رنت عليا .
ماما : انتي فين يبنتي الساعه داخله علي ١١ .انا : جايه يا ماما خلاص اهو .
" قفلت معاها وقومنا مشينا ، وصلت لحد البيت ونزلت من العربيه "
يوسف : يلا تصبح ع خير يقمر .انا : قولتلك مسميش قمر .
يوسف : الله هو القمر وحش؟ .
انا : لا يا سيدي مش وحش بس انا بحب اسمع اسمي كتير .
يوسف : ماشي يست ايسيل .
انا : ايوة شايف الحلاوة .
يوسف : طب اطلعي يا لمضه هانم .
ضحكنا وطلعت البيت و انا في كمية سعاده رهيبة ، دخلت البيت .
ماما : ايه يبنتي التأخير دا كله .
انا: معلش يا ماما كنت جعانه ويوسف خدني ناكل بره .
ماما : حلو ياختي الكلام دا حلو .
انا: بقولك ايه انا هدخل انام عشان عندي يوم طويل بكره يلا تصبحي ع خير يا ايفو .
ماما : وانتي من اهله ياختي .
دخلت الاوضه واترميت ع السرير كدا زي الافلام ، انا بجد اول مره اتبسط كدا هو الحب بيحلي كدا ، هو الحب بيخلي الواحد طاير من الفرحه اللي انا فيها دي ، غيرت هدومي ونمت علي السرير مسكت الفون لقيته باعتلي صورنا فتحتها وفضلت اتفرج عليها ، وبعدين قومت قعدت علي السرير واتكلمت مع نفسي افتكرت منه لم رنت عليا الصبح وقالتلي انها عايزني ف موضوع انا نسيت اسالها صحيح ، وهي متكلمتش معايا حتي ولا قالتلي حاجه ! ياتري كانت عايزه ايه دي ، وبعدين انا مش هتكلم معاها تاني اصلا بسبب الموقف البايخ اللي هي عملته انهارده ده .
بس برضو عايزه اعرف خبر ايه اللي هيفرحني دا ؟ ، وبعدها روحت في النوم .
****************
الي هنا قد انتهينا من الفصل الثالث من عجائب الحب ، لقراءة الفصل الاول اضغط هنا ولقراءة الفصل الثاني اضغط هنا وبقراءة الفصل الثالث اضغط هنا ، اتمني ان تنال إعجابكم ، القصة بقلم " ست ورد " شكراً لمشاركتك ، إذا كان هناك اي استفسار او سؤال يمكنكم قولها في التعليقات او التواصل معي عبر صفحة اتصل بنا ، ولمتابعتنا علي حساب الفيسبوك اضغط هنا ولتويتر اضغط هنا ، دمتم سالمين .
إرسال تعليق